Azərbaycan FİFA reytinqində
FİFA milli futbol komandalarının iyulun 10-na olan reytinqini açıqlayıb. Azərbaycan yığması 210 milli arasında 122-ci yerdə göstərilir.
İran 20-ci, Ukrayna 26-cı, Türkiyə 27-ci, Rusiya 35-ci, Özbəkistan 55-ci, Gürcüstan 67-ci, Belarus 97-ci, Qırğızıstan 104-cü, Ermənistan 105-ci, Tacikistan 106-cı, Qazaxıstan 114-cü, Estoniya 126-cı, Latviya 137-ci, Türkmənistan 140-cı, Litva 143-cü, Moldova 154-cü pillədədir.
Reytinq oyunların əhəmiyyəti, rəqiblərin oyuna qədər olan mövqeyi nəzərə alınmaqla əldə edilən nəticələr əsasında tərtib olunur.
Beynəlxalq turnirlərə 1994-cü ildən qatılan Azərbaycan milli komandası dörd Avropa çempionatının seçmə mərhələsini qrupda sonuncu, dördünü sondan əvvəlki yerdə bitirib.
Dörd dünya çempionatının seçmə mərhələsində yığma qrupda sonuncu, ikisində sondan əvvəlki, birində axırdan üçüncü pilləni tutub.
Milli bir yol UEFA Millətlər Liqasının D liqasında qrup ikincisi olub, C liqasında bir yol üçüncü, bir yol ikinci, bir yol dördüncü (sonuncu) pillədə yer alıb.
2024-cü il iyunun 12-dən Azərbaycan yığmasına portuqaliyalı Fernandu Santuş baş məşqçilik edir. Milli komanda onun rəhbərliyi altında 10 oyunun 8-ni uduzub, ikisini heç-heçə bitirib.
Əvvəllər milli komandanın sükanı arxasında Ələkbər Məmmədov, Ağasəlim Mircavadov, Kazbek Tuayev, Vaqif Sadıqov, Əhməd Ələsgərov, İqor Ponomaryov, Əsgər Abdullayev, Karlos Alberto Torres, Şahin Diniyev, Berti Foqts, Robert Prosineçki, Qurban Qurbanov, Nikola Yurçeviç, Canni De Byazi dayanıblar.
