Ukraynaya dəstək fondu gündəmə gəlib
Avropa İttifaqı Ukraynaya dəstək üçün 100 milyard avroluq xüsusi fond yaratmaq niyyətindədir. Xəbəri yayan “Blumberq” agentliyi bildirir ki, fond Avropa İttifaqının qarşıdakı yeddi illik büdcəsinin tərkib hissəsi kimi nəzərdə tutulur. Təklif dəstək qazanarsa, maliyyələşmənin 2028-ci ildə başlaması planlaşdırılır.
Rusiya 2014-cü ildə Ukraynanın Krım yarımadasını tutaraq özünə birləşdirib, Donetsk və Luqansk vilayətlərinin bir hissəsində işğalçı rejimlər qurub. 2022-ci il fevralın 24-dən Ukraynada total hərbi əməliyyatlar aparan Rusiya oktyabrın 5-də Donetsk, Luqansk, Zaporojye və Xerson vilayətlərini özünə birləşdirdiyini açıqlayıb. Ukraynaya dəstək verən Avropa İttifaqı indiyədək bu ölkəyə 160 milyard avroya yaxın vəsait ayırıb.
Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Türkiyə, Şimali Makedoniya, Monteneqro, Serbiya, Albaniya, Moldova, Ukrayna, Bosniya və Herseqovina, Gürcüstan Avropa İttifaqına namizəddir.
Mənbə: Bloomberg.com
