Trampın silah vədi: Müdafiə Nazirliyi də bəyan etdi
ABŞ prezidenti Donald Tramp Ukraynaya yeni silahlar vəd edib. Novator.az-ın məlumatına görə, iyulun 7-si paytaxt Vaşinqtonda İsrailin baş naziri Benyamin Netanyahu ilə bir araya gələn dövlət başçısı şam yeməyindən əvvəl jurnalistlərə deyib ki, özünü müdafiə edə bilməsi üçün Ukraynaya daha çox silah göndərməyə ehtiyac var.
Prezident Rusiyanın Ukraynaya çox güclü zərbələr vurduğunu qeyd edib: “Daha çox silah göndərməliyik, ilk növbədə müdafiə silahları”.
Ötən həftə Vaşinqtonun Kiyevə bəzi silahların tədarükünü dayandırdığı açıqlanıb, bu fonda Rusiyanın Ukraynaya hava hücumları daha da güclənib. Ukraynanın silahla təchizatına məhdudiyyətlər həm müxalif Demokratlar Partiyası, həm də Donald Trampın üzv olduğu Respublikaçı Partiyası dairələrini narazı salıb, tənqidlər səslənib.
Donald Trampın 7 iyul açıqlamasının ardından ABŞ-ın Müdafiə Nazirliyi Ukraynaya əlavə müdafiə silahları göndəriləcəyini rəsmən bəyan edib.
Rusiya 2014-cü ildə Ukraynanın Krım yarımadasını tutaraq özünə birləşdirib, Donetsk və Luqansk vilayətlərinin bir hissəsində işğalçı rejimlər qurub. 2022-ci il fevralın 24-dən Ukraynada total hərbi əməliyyatlar aparan Rusiya oktyabrın 5-də Donetsk, Luqansk, Zaporojye və Xerson vilayətlərini özünə birləşdirdiyini açıqlayıb.
İşğalçı savaş başqa bölgələri də əhatə edib, ölkənin hər yanına dağıdıcı silahlarla hücumlarla müşayiət olunur.
Donald Tramp 2025-ci ildə rusiyalı həmkarı Vladimir Putinlə altı dəfə telefon danışığı aparsa da, onu atəşkəsə razı sala bilməyib. Rusiya Ukraynanın təslim olub ərazi itkilərini qəbul etməsini, Qərblə yaxınlaşma kursundan üz çevirməsini istəyir.
2017-2021-ci illərdə ABŞ-a prezidentlik eləmiş Donald Tramp 2025-ci il yanvarın 20-dən yenidən dövlət başçısıdır. Seçkidən öncə onun əsas vədlərindən biri Ukrayna müharibəsinin daynadırılması olub.
Mənbə: Reuters.com
