Trampı postda saxlamaq təklifi – “Fox News”
“Donald Trampa üçüncü müddətə prezidentliyə namizədliyini irəli sürmək imkanı vermək gərəkdir”. Novator.az bildirir ki, belə bir təkliflə ABŞ Konqresinin Nümayəndələr Palatasının üzvü Endi Oqls çıxış edib.
Respublikaçılar Partiyasının üzvü olan Endi Oqls Nümayəndələr Palatasına Tennessi ştatından seçilib, Donald Trampın əsas müttəfiqlərindən sayılır. O, təklifini Konqresin aşağı və yuxarı palataları (Nümayəndələr Palatası və Senat) Donald Trampın genişmiqyaslı vergi və büdcə ixtisarı haqqında qanun layihəsini qəbul edəndən sonra səsləndirib.
Prezidentin iyulun 4-də imzalaması ilə qüvvəyə minən qanun bir sıra sahədə vergilərin və dövlət xərclərinin əhəmiyyətli dərəcədə azaldılmasını, müdafiə və daxili təhlükəsizlik xərclərinin müəyyən qədər artırılmasını və başqa məsələləri nəzərdə tutur. Trampın ikinci prezidentlik dönəminin sosial-iqtisadi, vergi, müdafiə, sərhəd, miqrasiya və enerji siyasətinin əsas istiqamətlərini müəyyənləşdirən 900 səhifəlik bu qanunun büdcəyə 3,4 trilyon dollara başa gələcəyi təxmin edilir.
Endi Oqls
Endi Oqls “Foks Nyus” (“Fox News”) kanalına açıqlamasında deyib ki, belə bir qanunun qəbulu tarixi hadisədir: “Bu qanun ABŞ iqtisadiyyatını canlandıracaq və ölkəmizdə yeni bir “qızıl dövr” başlanacaq. Prezident Trampın sayəsində biz Demokratlar Partiyasının hakimiyyəti dövründə ölkəmizə vurulan ziyanları, nəhayət, aradan qaldırmağa başlayırıq. Bu cür uğurlar ondan xəbər verir ki, biz Donald Trampın üçüncü müddətə prezident seçilməsinə imkan verilməsi məsələsinə baxmalıyıq. Artıq bu məsələyə çox ciddi yanaşılmalıdır”.
“Foks Nyus” bildirir ki, Endi Oqls hələ 2025-ci ilin yanvar ayının axırlarında, Donald Tramp ikinci dəfə prezident kimi and içib səlahiyyətlərinin icrasına başlayandan dərhal sonra ona üçüncü müddətə prezidentliyə namizəd olmaq imkanı vermək məqsədilə ABŞ Konstitusiyasına düzəlişləri nəzərdə tutan qanun layihəsi hazırlayıb.
1789-cu ildə qurulan ABŞ-ın tarixi ənənəsinə, 1951-ci ildən bəri isə həm də konstitusiya normasına görə, eyni şəxs maksimum iki dəfə prezident seçilə bilər. Yalnız Franklin Ruzvelt dövlət başçısı postuna dörd dəfə mandat alıb. O, 1932 və 1936-cı illərdə prezident seçilib, 1939-cu ildə İkinci Dünya müharibəsi başladığına görə 1940, 1944-cü illərdə də postunda qalmaq imkanı əldə edib.
Donald Tramp 1946-cı il iyunun 14-də doğulub. Pensilvaniya Universitetinin Uorton Biznes Məktəbini bitirib, tikinti maqnatı kimi ad çıxarıb. Respublikaçılar Partiyasının üzvüdür.
2016-cı ilin prezident seçkisində Donald Tramp Demokratlar Partiyasından Hillari Klintonu məğlub edib, 2017-ci il yanvarın 20-dən prezidentliyə başlayıb, 2020-ci ilin prezident seçkisində Demokratlar Partiyasının namizədi Cozef Baydenə uduzub, 2021-ci il yanvarın 20-də postunu tərk edib.
Donald Tramp 2024-cü il noyabrın 5-də keçirilmiş ümumxalq səsverməsində Demokratlar Partiyasının namizədi Kamala Harrisi yenib, dekabrın 17-də Seçicilər Kollegiyası onu prezident seçib, 2025-ci il yanvarın 6-da Konqres (Nümayəndələr Palatası ilə Senatın birgə iclası) seçkinin nəticələrini təsdiqləyib. Donald Tramp yanvarın 20-də and içərək səlahiyyətlərinin icrasına başlayıb.
Mənbə: Foxnews.com
