Konstitusiya Məhkəməsində yeniliklər
İyulun 4-də Konstitusiya Məhkəməsinə yeni hakimlər təyin olunub: Fərhad Tutayuk, Otari Qvaladze, Rauf Quliyev, Rəşid Rzayev.
9 hakimdən ibarət Konstitusiya Məhkəməsinin qalan üzvləri bu şəxslərdir: Fərhad Abdullayev (sədr), Fikrət Məmmədov, Humay Əfəndiyeva, Xanlar Vəliyev, İsa Nəcəfov.
Prezidentin təqdimatı əsasında Milli Məclisin 15 il müddətinə təyin etdiyi hakimlər 75 yaşa qədər vəzifədə ola bilər. 75 yaşına çatmış hakim yeni hakim təyin olunanadək, lakin 6 aydan çox olmayan müddətdə vəzifədə qalır.
Sədrin və sədr müavininin təyinatı prezidentin səlahiyyətindədir.
Seçkilərdə iştirak etmək hüquqlu, ali hüquq təhsilli və hüquqşünas ixtisası üzrə 5 ildən artıq işləyən Azərbaycan vətəndaşı Konstitusiya Məhkəməsinin hakimi ola bilər.
1998-ci il iyulun 14-də yaradılmış Konstitusiya Məhkəməsi qanunların, fərman, sərəncam və qərarların, normativ hüquqi aktların konstitusiyaya, qanunlara uyğunluğu üzrə məsələlərin; qanunvericilik, icra və məhkəmə hakimiyyətləri arasında səlahiyyətlər bölgüsü ilə bağlı mübahisələrin həllinə məsuldur, həmçinin Azərbaycan Konstitusiyasını və qanunlarını şərh edir.
Vətəndaşlar qanunvericilik və icra hakimiyyəti orqanlarının normativ aktlarından, bələdiyyə və məhkəmə aktlarından Konstitusiya Məhkəməsinə şikayət verə bilər.
Konstitusiya Məhkəməsi Bakıda, Gənclər Meydanı, 1 ünvanında yerləşır.
