Gürcüstan parlamenti müxalifsiz qaldı
Gürcüstan parlamentinin 2 iyul iclasında 12 deputatın mandatına xitam verilib. Qərar müxalif Gürcüstan Uğrunda Partiyasını təmsil edən həmin deputatların qanunverici orqanın iclaslarına heç qatılmaması ilə əsaslandırılıb.
Novator.az bildirir ki, 2024-cü il oktyabrın 26-da keçirilmiş parlament seçkisində hakim Gürcü Arzusu – Demokratik Gürcüstan Partiyası 150 yerlik qanunverici orqanda 89 mandata sahib çıxıb. Müxalif qurumlar – Yeniliklər koalisiyası 19, Birlik – Milli Hərəkat koalisiyası 16, Güclü Gürcüstan koalisiyası 14, Gürcüstan Uğrunda Partiyası 12 mandat alıb. Noyabrın 25-də yeni parlament fəaliyyətə başlayıb, ardınca hökumət formalaşıb.
Aparıcı müxalif qurumlar parlamenti tanımır. Yeniliklər koalisiyası, Birlik – Milli Hərəkat koalisiyası və Güclü Gürcüstan koalisiyası həm də mandatlardan rəsmən imtina edib. 2025-ci il fevralın 5-də parlament mandatdan imtina etmiş deputatların səlahiyyətinə xitam vermək qərarı çıxarıb.
Gürcüstan Uğrunda Partiyasının deputatları mandatdan imtina etməsələr də, parlamentin iclaslarına gəlmirdilər. Bu quruma sabiq baş nazir Georgi Qaxariya liderlik edir. 1975-ci il təvəllüdlü Georgi Qaxariya 2019-cu il sentyabrın 8-dən Gürcü Arzusunun təmsilçisi kimi hökumətə rəhbərlik edib, 2021-ci il fevralın 18-də müxalifətə təzyiqləri pisləyərək istefa verib, ardınca Gürcüstan Uğrunda Partiyasını yaradıb.
Gürcüstanda hökuməti parlamentdə azı 76 mandatı olan partiya qurur. 2012, 2016 və 2020-ci illərin parlament seçkilərində də Gürcü Arzusu qalib gəlib.
Oktyabrın 4-nə yerli seçkilər (mer və məclis seçkiləri) təyin olunub. Aparıcı müxalif qurumların bu seçkiləri boykot etməsi gözlənir.
Mənbə: 1tv.ge
