Rusiyanın gəliri azalır, xərci artır
Rusiyanın 2025-ci il büdcəsi yenilənib. Novator.az-ın məlumatına görə, iyunun 24-də rəsmiləşən qanunda gəlir proqnozu 1,8 trilyon rubla yaxın azalma ilə 38,5 trilyon rubla düşür, xərclər 41,4 trilyon rubldan 42,3 trilyon rubl həndəvərinə yüksəlir, 3,8 trilyon rubl kəsir nəzərdə tutulur.
1 Rusiya rublu 2 qəpikdən bir az bahadır.
Sənayenin inkişafına vəsaitin 97,15 milyard rubl, elmi-texniki inkişafa vəsaitin 22,17 milyard rubl, aviasiya sənayesinə vəsaitin 9,6 milyard rubl, enerji sektorunun inkişafına vəsaitin 7,2 milyard rubl, gəmiqayırmaya vəsaitin 4,1 milyard rubl azaldılacağı bildirilir.
Rəsmi təqdimata əsasən, dürüstləşdirilən büdcədə bir barrel neft 56 dollardan götürülür. Büdcənin əvvəlki variantında bu rəqəm 69,7 dollar olub.
“Moscow Times” xəbər verir ki, büdcə yeniliyi ölkənin neft-qaz gəlirlərinin azalmasından doğur. Hesablamaya görə, bu il Rusiyanın neft-qaz gəlirləri 8,3 trilyon rublu ötməyəcək. Büdcənin ilkin variantında gəlir proqnozu 10,8 trilyon rubl idi.
2014-cü ildən başlayaraq Rusiya iqtisadiyyatı ölkənin Ukraynaya təcavüzü fonunda ağır sanksiyalara məruz qalır.
