Savaşan dövlətlərin siyasi sistemi
İyunun 13-dən İsrail Dövləti ilə İran İslam Respublikası arasında savaş gedir.
Novator.az bildirir ki, İsrail Dövləti 1948-ci ildə, Fələstin torpaqlarının bölünməsi hesabına yaradılıb. Parlament respublikasıdır. Hökuməti ümumxalq səsverməsində proporsional üsulla (partiya siyahıları üzrə) seçilən 120 nəfərlik parlamentdə (Knesset) azı 61 mandatı olan siyasi qüvvə qurur.
Knesset dörd ildən bir seçilir. Son seçki 2022-ci il noyabrın 1-də keçirilib. Baş nazir Benyamin Netanyahunun liderlik etdiyi Likud Partiyasının və müttəfiqlərinin Knessetdə 67 mandatı var.
1949-cu il təvəllüdlü Benyamin Netanyahu 2022-ci il dekabrın 22-dən baş nazirdir. O, 1996-1999 və 2009-2021-ci illərdə də hökumətə rəhbərlik edib.
İsraildə parlamentin seçdiyi prezident dövlət başçısı sayılır. Prezidentin səlahiyyət müddəti 7 ildir. Bir dəfədən artıq prezident seçilmək yasaqdır. İndiki prezident İshaq Hersoq 2021-ci il iyulun 7-dən bu postdadır.
İran İslam Respublikası 1979-cu ildə, inqilab dalğasında yaradılıb. Dövlət başçısı səlahiyyətlərini Üləmalar Məclisinin seçdiyi ali rəhbər həyata keçirir. 1989-cu il iyunun 3-dən bu postu 1939-cu il təvəllüdlü Əli Xamneyi tutur.
Hökumət başçısı funksiyası daşıyan İran prezidenti ümumxalq səsverməsində 4 il müddətinə seçilir. 2024-cü il iyulun 28-dən 1954-cü il təvəllüdlü Məsud Pezeşkian prezidentdir.
290 nəfərlik ölkə parlamenti (İslam Şurası Məclisi) 4 ildən bir majoritar sistemlə (dairələr üzrə) seçilir. İndiki parlament 2024-cü ilin yazında formalaşıb.
