İsrail-İran savaşı: ilk xəbərlər

İyunun 13-də İsrail İrana qarşı hərbi əməliyyatlara başlayıb. Günorta saatlarına olan məlumata görə, İsrailin 200-dən çox qırıcı təyyarəsi İranda azı yüz hədəfi vurub.

Novator.az bildirir ki, hava zərbələri əsasən Nətənz nüvə obyektinə, ballistik raket bazalarına, raketlərin istehsal olunduğu və sınaqdan keçirildiyi mərkəzlərə endirilib. Bu sıraya Tehran, Təbriz, İsfahan, Kirmanşah şəhərlərində və digər məkanlarda yerləşən obyektlər daxildir.

Hüseyn Səlami və Məhəmməd Baqiri

Paytaxt Tehrandan 200 kilometr cənub-şərqdə yerləşən Nətənzin əsas hədəfə çevrilməsinin səbəbi ondadır ki, İranın nüvə yanacağının böyük hissəsi, o cümlədən zənginləşdirilmiş uran ehtiyatı burada saxlanır.

İlkin məlumatlara görə, İsrailin hücumları nəticəsində İranın bir neçə nüvə alimi – Tehran İslam Azad Universitetinin rektoru Məhəmməd Mehdi Tehrançı, İranın Atom Enerjisi Təşkilatının sabiq rəhbəri Firudin Abbasi, Əbdülhəmid Mənuçehr, Əhmədrza Zülfüqari, Əmirhüseyn Fiqhi, Mütəlliblizadə və yüksək vəzifəli generalları – İran Silahlı Qüvvələri Baş Qərargahın rəisi Məhəmməd Baqiri, İnqilab Keşikçiləri Korpusunun (SEPAH) komandanı Hüseyn Səlami öldürülüb.