Final yolçuları
2026-cı ilin dünya futbol çempionatının final mərhələsinə 48 milli komanda qatılacaq. ABŞ, Kanada və Meksikanın ev sahibləri olduğu raunda indiyədək Asiyadan İran, Özbəkistan, Cənubi Koreya, İordaniya, Yaponiya, Avstraliya, Cənubi Amerikadan Argentina, Ekvador, Braziliya, Okeaniyadan Yeni Zelandiya adlayıb.
Turnirdə Avropaya 16, Afrikaya 9, Asiyaya 8, Cənubi Amerikaya 6, Şimali və Mərkəzi Amerikaya 6 (meydan sahibləri ilə birgə), Okeaniyaya 1 yer ayrılıb. Qalan 2 vəsiqənin sahibi Afrika, Asiya, Okeaniya, Cənubi Amerika, Şimali və Mərkəzi Amerika təmsilçiləri arasında əlavə oyunlarda müəyyənləşəcək.
Avropa zonası üzrə seçmə mərhələdə 54 UEFA üzvü 12 qrupa bölünüb. Qrup qalibləri final mərhələsinə birbaşa vəsiqə alacaq, ikincilər və Millətlər Liqasının dörd ən yaxşı komandası qalan biletlər uğrunda yarışacaq.
Azərbaycan milli komandası D qrupunda Fransa, Ukrayna və İslandiyaya rəqib olub.
Reqlamentə görə, final mərhələsində 4 komandalıq 12 qrupda ilk iki yeri tutanlar və ən yaxşı nəticə göstərmiş 8 komanda 1/16 finala bilet alacaq.
1930 və 1950-ci illərdə Uruqvay, 1934, 1938, 1982 və 2006-cı illərdə İtaliya, 1954, 1974, 1990 və 2014-cü illərdə Almaniya (Qərbi Almaniya), 1958, 1962, 1970, 1994 və 2002-ci illərdə Braziliya, 1966-cı ildə İngiltərə, 1978, 1986 və 2022-ci illərdə Argentina, 1998 və 2018-ci illərdə Fransa, 2010-cu ildə İspaniya dünya çempionu olub.
