İsrailin Ukraynaya “Patriot” ötürdüyü təsdiqlənib
İsrailin Ukraynaya “Patriot” zenit-raket kompleksləri ötürdüyü rəsmən təsdiqini tapıb.
Novator.az Ukraynanın ingilisdilli “Kiyev Post” (“Kyiv Post”) qəzetinə istinadla bildirir ki, bunu İsrailin Ukraynadakı səfiri Mixael Brodski ukraynalı jurnalist, bloqçu Mariçka Dobvenkoya müsahibəsində təsdiqləyib. Müsahibə Mariçka Dobvenkonun “Yutub” kanalında yayımlanıb.
Səfir Mixael Brodski deyib: “1990-cı illərin əvvəllərində ABŞ-dan aldığımız, o vaxtdan İsrailin müdafiəsində istifadə etdiyimiz “Patriot” sistemləri hazırda Ukraynadadır. Təəssüf ki, bəziləri İsrailin Ukraynaya hərbi yardım etmədiyini düşünür. Bu, doğru fikir deyil”.
Hələ 2024-cü ilin iyununda Britaniyanın “Fayneşnl Tayms” (“Financial Times”) qəzeti özəl mənbələrinə istinadla yazmışdı ki, Vaşinqton, Tel-Əviv və Kiyev arasında Ukrayna ordusuna “Patriot” sistemlərinin tədarük olunması məqsədilə danışıqlar aparılır. O zaman qəzet qeyd etmişdi ki, İsrail Ukrayna dövlətinə səkkiz ədəd hava hücumundan müdafiə sistemi verməyə hazırlaşır.
Mənbə: Kyivpost.com
