Klub turnirlərində yenilənmiş sxem
Yenilənmiş sxemə görə, UEFA-nın klub turnirlərində 2025-2026 mövsümünə 54 UEFA üzvünün (Rusiya yarışlardan kənardır) 238 komandası buraxılır: Çempionlar Liqasına 82, Avropa Liqasına 45, Konfrans Liqasına 111 komanda dəvət alır.
Çempionlar Liqasının birinci təsnifat mərhələsində ələnənlər Konfrans Liqasına, sonrakı mərhələlərində ələnənlər Avropa Liqasına, Avropa Liqasının təsnifat raundlarında ələnənlər Konfrans Liqasına köçür. Hər üç turnirin liqa mərhələsində 36 komandanın iştirakı nəzərdə tutulur, 9-24-cü yerləri tutanlar 1/16 finala, ilk 8 pilləni tutanlar 1/8 finala bilet alır.
Azərbaycan təmsilçisi “Qarabağ” Çempionlar Liqasına çempionlar yolunun ikinci mərhələsində start götürür, Avropa Liqası Azərbaycan üçün birinci mərhələdən, Konfrans Liqası ikinci mərhələdən başlayır.
Turnirlər 2025-ci il iyulun 8-də yola çıxır. Avropa Liqasının finalı 2026-cı il mayın 20-nə (İstanbul), Konfrans Liqasının finalı mayın 27-nə (Leypsiq), Çempionlar Liqasının finalı mayın 30-na (Budapeşt) təyin olunub.
