İlk rübün xarici ticarəti
Azərbaycan 2025-ci ilin yanvar-mart aylarında 151 ölkə ilə ticarət əməliyyatı aparıb, ixrac 6,3 milyard dolları, idxal 5,6 milyard dolları ötüb. Dövlət Gömrük Komitəsi bildirir ki, ixracın 88 faizə yaxını neft-qaz sektorunun payına düşüb. Qeyri-neft/qaz sektoru üzrə ixrac 772 milyon dollar həndəvərində göstərilir, ilk üçlükdə meyvə-tərəvəz (153,3 milyon dollar), kimya sənayesi məhsulları (87,1 milyon dollar), plastmas və ondan hazırlanan məmulatlar (81,7 milyon dollar) yer alır.
İdxalda əsas üç məhsul belə sıralanır: maşın, mexanizm, elektrik aparatları, avadanlıqlar və onların hissələri – 788,9 milyon dollar, yeyinti məhsulları – 633,7 milyon dollar, nəqliyyat vasitələri və onların hissələri – 493,6 milyon dollar.
Hesabata görə, ixracın 5,53 faizi MDB ölkələrinə, 72,51 faizi Avropa İttifaqı ölkələrinə, 21,96 faizi başqa ölkələrə yönəlib, idxalda MDB-nin payı 28,29 faiz, Avropa İttifaqının payı 11,53 faiz, başqa ölkələrin payı 60,18 faiz olub, ticarət dövriyyəsində və ixracda əsas tərəfdaş qismində İtaliya, idxalda əsas tərəfdaş kimi Rusiya qərar tutub.
