Sərhəd qərarı dəyişmədi
Nazirlər Kabineti xüsusi karantin rejimini 2025-ci il iyulun 1-dək uzadıb. Qərar martın 18-də imzalanıb.
Rejimin aprelin 1-də başa çatması nəzərdə tutulmuşdu.
2020-ci il martın 31-də koronavirus infeksiyasına görə tətbiq olunmuş xüsusi karantin rejimi ölkəyə giriş-çıxışa məhdudiyyət qoyur – quru sərhədlər bağlıdır.
Quru sərhədlərin bağlı saxlanması daxili təhlükəsizliyi təmin etmək zərurəti ilə əsaslandırılır.
2019-cu ilin dekabrında Çində üzə çıxan yeni koronavirus infeksiyası dünyanı bürüyüb. 2020-ci il martın 11-dən 2023-cü il mayın 5-dək qlobal pandemiya elan olunan infeksiya 7 milyondan çox adamın ölümünə gətirib. Rəsmi statistikaya görə, Azərbaycanda 10,4 min nəfər koronavirusun qurbanı olub.
