Yeni məhkumluq
Bakı Ağır Cinayətlər Məhkəməsi martın 10-da siyasətçi Tofiq Yaqubluya 9 il azadlıqdan məhrumetmə cəzası kəsib. 2023-cü il dekabrın 14-də tutulmuş Tofiq Yaqublu külli miqdarda ziyan vurmaqla dələduzluqda, rəsmi sənədləri saxtalaşdırmada və bilə-bilə saxta sənədlərdən istifadə etmədə təqsirli bilinib. Onunla birgə mühakimə olunan Elnur Məmmədov 8 il müddətinə azadlıqdan məhrum edilib.
1961-ci il təvəllüdlü Tofiq Yaqublu milli azadlıq hərəkatının (1988-1991) fəalı, Birinci Qarabağ müharibəsinin veteranıdır. Müsavat Partiyasının və Demokratik Qüvvələrin Milli Şurasının üzvüdür.
1998-ci ildə 2 il müddətinə şərti azadlıqdan məhrumetmə cəzasına məhkum edilib.
2013-cü il fevralın 4-dən 2016-cı il martın 17-dək həbsdə olub.
2020-ci il martın 22-də Tofiq Yaqublu yenidən tutulub, sentyabrın 3-də Bakının Nizami Rayon Məhkəməsinin hökmü ilə 4 il 3 aylıq azadlıqdan məhrumetmə cəzası alıb. Sentyabrın 18-də Bakı Apellyasiya Məhkəməsi Tofiq Yaqublu haqqında həbs qətimkan tədbirini ev dustaqlığı ilə əvəzləyib.
2021-ci il iyulun 15-də Bakı Apellyasiya Məhkəməsi siyasətçiyə kəsilən 4 il 3 aylıq azadlıqdan məhrumetmə cəzasının yerdə qalan hissəsini şərti cəza ilə əvəzləyib, 2022-ci il noyabrın 1-də Ali Məhkəmə həmin qərarı qüvvədə saxlayıb.
