Yohannis postdan getdi
Fevralın 12-si Rumıniyada prezident səlahiyyətləri parlamentin yuxarı palatasının – Senatın sədri İliye Bolojana keçir.
Prezidentin səlahiyyət müddəti beş ildir. 2014 və 2019-cu illərdə Klaus Yohannis dövlət başçısı seçilib. 2024-cü il noyabrın 24-də keçirilmiş prezident seçkisində partiyasız namizəd Kalin Corcesku və Rumıniyanın Xilası İttifaqının təmsilçisi Yelena Laskoni önə çıxıblar. Seçkinin ikinci turu dekabrın 8-nə təyin olunub, ancaq dekabrın 6-da Konstitusiya Məhkəməsi birinci turun nəticələrini ləğv edib, seçki kampaniyasının yenidən təşkil olunmasına qərar verib. Yeni seçkinin 2025-ci il mayın 4-də keçirilməsi gözlənir.
Klaus Yohannis müxalif düşərgənin impiçment təşəbbüslərini nəzərə alaraq fevralın 10-da istefa bəyanatı verib.
Rumıniyada hökuməti dörd ildən bir proporsional üsulla (partiya siyahıları üzrə) seçilən parlamentdə çoxluq əldə edən siyasi qüvvə qurur. Senat 136 nəfərdən, aşağı palata – Deputatlar Palatası 331 nəfərdən ibarətdir.
