Gürcüstan parlamenti qayçılandı
Gürcüstan parlamenti mandatdan imtina etmiş müxalif deputatların səlahiyyətinə xitam verib. Qərar fevralın 5-də qəbul olunub.
2024-cü il oktyabrın 26-da keçirilmiş seçkidə hakim Gürcü Arzusu – Demokratik Gürcüstan Partiyası 150 yerlik parlamentdə 89 mandata sahib çıxıb. Müxalif qurumlar – Yeniliklər koalisiyası 19, Birlik – Milli Hərəkat koalisiyası 16, Güclü Gürcüstan koalisiyası 14, Gürcüstan Uğrunda Partiyası 12 mandat alıb. Noyabrın 25-də yeni parlament fəaliyyətə başlayıb, ardınca hökumət formalaşıb, dekabrın 14-də isə Gürcü Arzusunun namizədi prezident seçilib.
Aparıcı müxalif qurumlar parlamenti tanımır. Yeniliklər koalisiyası, Birlik – Milli Hərəkat koalisiyası və Güclü Gürcüstan koalisiyası həm də mandatdan rəsmən imtina edib.
Gürcüstanda hökuməti parlamentdə azı 76 mandatı olan partiya qurur. 2012, 2016 və 2020-ci illərin parlament seçkilərində də Gürcü Arzusu qalib gəlib.
