“Qarabağ”ın Avropa yolu
Azərbaycanın “Qarabağ” komandası UEFA-nın klub turnirlərinin 2024-2025 mövsümünə Çempionlar Liqasında başlayaraq Avropa Liqasına köçdü, liqa mərhələsində ələndi.
“Qarabağ” əvvəllər 19 dəfə UEFA-nın əsas klub turnirlərinə vəsiqə əldə edib. 1996-1997, 1998-1999 mövsümlərində komanda Kuboklar kubokunun (ləğv edilib), 1997-1998, 2004-2005, 2006-2007 mövsümlərində UEFA kubokunun (indiki Avropa Liqası) ilk mərhələsində ələnib, 2009-2010, 2011-2012 mövsümlərində Avropa Liqasında iki, 2010-2011, 2013-2014 mövsümlərində üç raund aşıb.
2014-2015, 2015-2016, 2016-2017, 2018-2019, 2019-2020, 2020-2021 mövsümlərinə “Qarabağ” Çempionlar Liqasında start verib, Avropa Liqasına adlayaraq qrup mərhələsində mübarizə aparıb.
2017-2018 mövsümündə komanda Çempionlar Liqasının qrup mərhələsində oynayıb.
2021-2022-ci il mövsümünə Konfrans Liqasında başlayan “Qarabağ” 1/16 finalda büdrəyib.
2022-2023 mövsümünə Çempionlar Liqasında başlayan “Qarabağ” əvvəl Avropa Liqasına, sonra Konfrans Liqasına adlayıb, 1/16 finalda uduzub.
2023-2024 mövsümünə Çempionlar Liqasında start verən “Qarabağ” Avropa Liqasına keçərək 1/8 finala qədər irəliləyib.
1951-ci ildə Ağdam şəhərində yaradılan “Qarabağ” komandası (“Məhsul”, “Şəfəq” və “Kooperator” adları da daşıyıb) 1 dəfə Azərbaycan SSR-in, 11 dəfə müstəqil Azərbaycanın çempionu olub, 8 dəfə Azərbaycan kubokunu qazanıb.
2008-ci ildən komandaya Qurban Qurbanov baş məşqçilik edir. 1972-ci il təvəllüdlü Qurban Qurbanov Azərbaycanın “Daşqın”, “Turan”, “Kür-Nur”, “Neftçi”, “İnter”, Gürcüstanın “Mertsxali”, “Alazani”, Rusiyanın “Dinamo” (Stavropol), “Fakel”, “Baltika”, “Volqar” klublarının və Azərbaycanın milli komandasının hücumçusu olub, “İnter”də idman direktoru, “Neftçi”də baş məşqçi və idman direktoru vəzifələrini tutub.
Qurban Qurbanov 2017-ci ilin noyabr ayından 2018-ci ilin dekabr ayınadək Azərbaycan milli komandasının da sükanı arxasında dayanıb.
