Tramp Davos tribunasından nefti ucuzlaşdırmağa çağırdı
Yanvarın 23-də Dünya İqtisadi Forumuna video ilə bağlanan ABŞ prezidenti Donald Tramp neftin ucuzlaşmasına çağırış edib.
Forum İsveçrənin Davos şəhərində keçirilir.
Cnbc.com-un məlumatına görə, 23 yanvar çıxışında Donald Tramp qeyd edib ki, dünya bazarında neftin qiyməti düşməlidir və bu, Rusiya-Ukrayna müharibəsinin tezliklə dayanmasına yol aça bilər: “Səudiyyə Ərəbistanı və OPEK Ukraynadakı müharibənin davam etməsində müəyyən məsuliyyət daşıyırlar. Mən Səudiyyə Ərəbistanı və OPEK-dən neftin qiymətinin aşağı salınmasını xahiş edəcəyəm”.
Dünya bazarında neftin qiymətini ixracatçıların OPEK+ koalisiyası hasilat razılaşmaları ilə tənzimləyir. OPEK-ə Birləşmiş Ərəb Əmirlikləri, Ekvatorial Qvineya, Əlcəzair, İraq, İran, Konqo, Küveyt, Liviya, Qabon, Nigeriya, Səudiyyə Ərəbistanı, Venesuela daxildir, Azərbaycan, Bəhreyn, Braziliya, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan tərəfdaşlar sayılır.
Koalisiyanın son razılaşmasına görə, 2025 və 2026-cı illərdə xam neftin gündəlik hasilatı 39 milyon 725 min barreli ötə bilməz. Azərbaycanın kvotası 551 min barreldir. Hasilatda lider ölkələr üzrə normalar belə müəyyən olunub: Səudiyyə Ərəbistanı – 10 milyon 478 min barrel, Rusiya – 9 milyon 949 min barrel, İraq – 4 milyon 431 min barrel, Birləşmiş Ərəb Əmirlikləri – 3 milyon 519 min barrel, Küveyt – 2 milyon 676 min barrel, Meksika – 1 milyon 753 min barrel, Qazaxıstan – 1 milyon 628 min barrel, Nigeriya – 1 milyon 500 min barrel, Əlcəzair – 1 milyon 7 min barrel (Mənbə: Opec.org).
Azərbaycanın dövlət büdcəsində bir barrel neft 70 dollardan götürülüb. Yanvarın 23-də “AzəriLayt” markalı Azərbaycan neftinin barreli 81,99 dollara satılıb.
