Maaş statistikası
Rəsmi statistika yanvarın 1-nə iqtisadi fəal əhalinin 5 milyon 29,8 min nəfərini məşğul şəxs, 217,2 min nəfərini işsiz kimi qeydə alıb.
Hesabata görə, 2024-cü il dekabrın 1-nə 1 milyon 775,3 min nəfər muzdla çalışıb, onların orta aylıq nominal əməkhaqqı 2023-cü ilin eyni dövrü ilə müqayisədə 8 faiz artaraq 996,8 manata çatıb. Bir çox sahədə orta maaş daha yüksək olub: mədən sənayesi – 3539,7 manat, maliyyə və sığorta fəaliyyəti – 2671,3 manat, peşə fəaliyyəti, elmi və texniki fəaliyyət – 1675,1 manat, informasiya və rabitə – 1660,9 manat, dövlət idarəetməsi və müdafiə; sosial təminat – 1381,6 manat, nəqliyyat və anbar təsərrüfatı – 1381,2 manat, elektrik enerjisi, qaz və buxar istehsalı, bölüşdürülməsi və təchizatı – 1104,5 manat, tikinti – 1083,2 manat, daşınmaz əmlakla əlaqədar əməliyyatlar – 1063,5 manat.
Muzdlu işçilərin minimum aylıq əməkhaqqı 400 manatdır.
Azərbaycanda pensiyalar orta aylıq nominal əməkhaqqının illik artım tempinə uyğun indeksləşdirilir. Yekun rəqəm fevralda açıqlanacaq.
Fevralın 1-dən əmək pensiyasının minimum məbləği 320 manat olacaq. Ölkədə kişilər 65, qadınlar 64 yaşda pensiyaya çıxır (2026-cı il iyulun 1-dən qadınların da pensiya yaşı 65-ə yüksələcək). Yanvarın 1-nə pensiyaçıların sayı 1 milyon 98,6 min nəfər göstərilib.
