Almaniyada seçki sorğusu
Fevralın 23-ü Almaniyada növbədənkənar parlament seçkisi keçiriləcək. Novator.az bildirir ki, İNSA İnstitutunun keçirdiyi rəy sorğusunda Xristian Demokrat və Xristian Sosial ittifaqları önə çıxıb. Hesabata görə, bu alyans 630 nəfərlik Bundestaqa 200 mandat qazana bilər.
Almaniya Üçün Alternativ Partiyasının 148, Sosial Demokrat Partiyasının 110, Yaşıllar Partiyasının 90, Sara Vaqenkneht İttifaqının 48, Azad Demokrat Partiyasının 34 yer götürməsi ehtimal olunur.
İndiki parlamentdə 28 təmsilçisi olan Sol Partiyanın mandatsız qalmaq təhlükəsi var.
2021-ci ilin parlament seçkisindən sonra Sosial Demokrat Partiyası, Yaşıllar Partiyası və Azad Demokrat Partiyası koalisiya qurub, Sosial Demokrat Partiyasının təmsilçisi Olaf Şolts hökumət başçısı – kansler seçilib. 2024-cü ilin noyabrında Azad Demokrat Partiyası koalisiyanı tərk edib, hökumət böhranı yaranıb. Bundestaq dekabrın 16-da hökumətə etimadsızlıq göstərib, prezident Frank-Valter Ştaynmayer dekabrın 27-də parlamenti buraxaraq növbədənkənar seçki təyin edib.
Mənbə: Dawum.de
