İxrac-idxal incəlikləri
Azərbaycan 2024-cü ildə 180 ölkə ilə ticarət əməliyyatı aparıb, ixrac 26,5 milyard dolları, idxal 21 milyard dolları ötüb. Hesabatı yayan Dövlət Gömrük Komitəsi bildirir ki, ixracın 87,4 faizi neft-qaz sektorunun payına düşüb. Xam neft və xam neft məhsulu üzrə 14,4 milyard dollarlıq ixracın qeydə alındığı, ünvanların ilk beşliyində İtaliya, Çexiya, Xorvatiya, Hindistan, Almaniyanın dayandığı bildirilir.
Qeyri-neft/qaz sektoru üzrə ixrac 3,3 milyard dollar göstərilir, ilk beşlikdə meyvə-tərəvəz (707,7 milyon dollar), plastmas və ondan hazırlanan məmulatlar (368,8 milyon dollar), kimya sənayesi məhsulları (293,7 milyon dollar), alüminium və ondan hazırlanan məmulatlar (197,1 milyon dollar), pambıq lifi (178,1 milyon dollar) yer alır.
Əsas beş idxal məhsulu belə sıralanır: maşın, mexanizm, elektrik aparatları, avadanlıqlar və onların hissələri – 3,8 milyard dollar, yeyinti məhsulları – 2 milyard 474,8 milyon dollar, nəqliyyat vasitələri və onların hissələri – 2 milyard 426,9 milyon dollar, qara metallar və onlardan hazırlanan məmulatlar – 1,1 milyard dollar, plastmas və onlardan hazırlanan məmulatlar – 533,1 milyon dollar.
İxracın 6,4 faizi MDB ölkələrinə, 63,3 faizi Avropa İttifaqı ölkələrinə, 30,3 faizi başqa ölkələrə yönəlib, idxalda MDB-nin payı 24,8 faiz, Avropa İttifaqının payı 13,2 faiz, başqa ölkələrin payı 62 faiz olub.
Ticarət dövriyyəsində və ixracda əsas tərəfdaş qismində İtaliya, idxalda əsas tərəfdaş kimi Çin qərar tutub.
Qonşulara gəlincə, Azərbaycandan Türkiyəyə 3,8 milyard, Rusiyaya 1,1 milyard dollarlıq, Gürcüstana 675,1 milyon, İrana 14 milyon dollarlıq məhsul göndərilib, ölkə Rusiyadan 3,6 milyard, Türkiyədən 2,3 milyard dollarlıq, İrandan 633 milyon, Gürcüstandan 128,8 milyon dollarlıq mal alıb.
