Sabiq baş nazir döyülüb
Gürcüstanın sabiq baş naziri, müxalif lider Georgi Qaxariya yanvarın 14-ü axşam Batumi şəhərində döyülüb. Rəsmi məlumata görə, “Şeraton” mehmanxanasında Georgi Qaxariyaya hakimiyyətə yaxın bir neçə şəxs hücum çəkib, siyasətçi beyin silkələnməsi keçirib və burnundan xəsarət alıb.
Novator.az bildirir ki, Georgi Qaxariya 1975-ci ildə doğulub. 2019-cu il sentyabrın 8-dən Gürcü Arzusu – Demokratik Gürcüstan Partiyasının təmsilçisi kimi hökumətə rəhbərlik edib, 2021-ci il fevralın 18-də müxalifətə təzyiqləri pisləyərək istefa verib, ardınca Gürcüstan Uğrunda Partiyasını yaradıb.
Gürcüstanda hökuməti 150 nəfərlik parlamentdə azı 76 mandatı olan partiya qurur. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası qalib gəlib.
2024-cü il oktyabrın 26-da keçirilmiş parlament seçkisində Gürcü Arzusu 89 mandata sahib çıxıb. 61 mandat müxalifətə qismət olub, ancaq bu qüvvələr, o cümlədən 12 mandat almış Gürcüstan Uğrunda Partiyası yeni parlamenti boykot edib.
