ABŞ-Ermənistan xartiyası
Ermənistanın xarici işlər naziri Ararat Mirzoyan və ABŞ-ın dövlət katibi Entoni Blinken yanvarın 14-ü Vaşinqtonda strateji tərəfdaşlıq komissiyası yaradılması barədə xartiya imzalayıblar. Novator.az bildirir ki, komissiyanın iqtisadiyyat, müdafiə, təhlükəsizlik, demokratiyanın inkişafı və azad məhkəmə quruculuğu sahələrində əməkdaşlığın dərinləşdirilməsi üzrə planlar hazırlayacağı bəyan olunub.
Rəsmi açıqlamalara görə, əməkdaşlığın əsas istiqamətləri arasında Ermənistanda dinc atom enerjisinin inkişafına, ölkənin sərhəd və gömrük təhlükəsizliyinin möhkəmləndirilməsinə dəstək layihələri də yer alır.
Ermənistanla strateji tərəfdaşlıq xartiyası ABŞ-da hakimiyyət dəyişikliyi ərəfəsinə təsadüf edir. 2021-ci il yanvarın 20-dən prezident postunu Demokratlar Partiyasından Cozef Bayden tutur.
2024-cü il noyabrın 5-də keçirilmiş ümumxalq səsverməsində Respublikaçılar Partiyasından Donald Tramp 538 nəfərlik Seçicilər Kollegiyasında 312 nümayəndəyə sahib çıxıb, dekabrın 17-də Seçicilər Kollegiyası onu eyni üstünlüklə prezident seçib. 2025-ci il yanvarın 6-da ABŞ Konqresi (Nümayəndələr Palatası ilə Senatın birgə iclası) prezident seçkisinin nəticələrini təsdiqləyib. Andiçmə mərasimi yanvarın 20-nə təyin olunub.
1946-cı il təvəllüdlü Donald Tramp 2017-2021-ci illərdə də ABŞ prezidenti olub.
