Zelenski nə qədər maaş alır?
Ukrayna prezidenti Vladimir Zelenski 2024-cü ildə 336 min qrivna (13473,6 manat) əməkhaqqı alıb. Hesabatı Dövlət İşlər İdarəsi yayıb. Məlumatda qeyd olunur ki, bu məbləğin 66500 qrivnası (2666,6 manat) vergilərə cəlb olunub, dövlət başçısı üçün hər hansı əlavə ödəniş və mükafat nəzərdə tutulmayıb.
Prezidentin aylıq maaşı 28000 qrivnadır (1122,8 manat).
Novator.az bildirir ki, 1978-ci il yanvarın 25-də doğulan Vladimir Zelenski Krivoy Roq İqtisadiyyat İnstitutunu hüquqşünas diplomu ilə bitirib, ancaq heç vaxt öz ixtisası üzrə işləməyib, telejurnalist, şoumen, aktyor kimi fəaliyyət göstərib.
2019-cu ildə prezident seçkisinə Xalq Xidmətçisi Partiyasının namizədi kimi qatılan Vladimir Zelenski ikinci turda qalib gəlib, mayın 20-də səlahiyyətlərinin icrasına başlayıb. Onun səlahiyyət müddəti 2024-cü il mayın 20-də baş çatsa da, müharibə dövründə seçki keçirməmək qərarı verilib.
2014-cü ildə Rusiya Ukraynanın Krım yarımadasını tutaraq özünə birləşdirib, Donetsk və Luqansk vilayətlərinin bir hissəsində işğalçı rejimlər qurub. 2022-ci il fevralın 21-də Rusiya Donetsk və Luqansk rejimlərini “müstəqil dövlətlər” kimi tanıyıb, fevralın 24-dən Ukraynada total hərbi əməliyyatlara başlayıb, sentyabrın 29-da Zaporojye və Xerson vilayətlərini “suveren və müstəqil” subyektlər kimi tanıyıb, oktyabrın 5-də həmin bölgələri, eləcə də Donetsk və Luqansk vilayətlərini özünə birləşdirdiyini açıqlayıb.
Mənbə: 24tv.ua
