Samir Şərifovun postu dəyişdi
Prezident İlham Əliyev Samir Şərifovu maliyyə naziri vəzifəsindən çıxararaq baş nazirin müavini təyin edib. Sərəncamlar yanvarın 10-da imzalanıb.
Samir Şərifov 2006-cı ildən maliyyə naziri idi.
1961-ci il sentyabrın 7-də doğulan Samir Şərifov Kiyev Dövlət Universitetində beynəlxalq iqtisadi əlaqələr üzrə ali təhsil alıb. 1983-cü ildən SSRİ-nin xarici iqtisadi əlaqələr sistemində (Bakıda və Yəmən Xalq Demokratik Respublikasında) iqtisadçı kimi çalışıb.
1991-ci ildən Azərbaycan Xarici İşlər Nazirliyinin beynəlxalq iqtisadi əlaqələr idarəsində şöbə müdiri, idarə rəisinin müavini postlarını tutub.
1995-ci ildən Azərbaycan Milli Bankının departament direktoru, baş direktoru, 2001-2006-cı illərdə Dövlət Neft Fondunun icraçı direktoru olub.
“Şöhrət” ordeni laureatıdır.
