Gürcüstanda seçki nöqtəsi
Gürcüstanın yeni seçilmiş prezidenti Mixail Kavelaşvili dekabrın 29-da and içərək səlahiyyətlərinin icrasına başlayıb.
1971-ci il təvəllüdlü Mixail Kavelaşvili futbol veteranıdır. Parlamentin deputatı, hakim Gürcü Arzusu – Demokratik Gürcüstan Partiyasına yaxınlığı ilə tanınan Xalqın Gücü Partiyasının siyasi katibi olub. Onu Seçicilər Kollegiyası dekabrın 14-də prezident seçib.
Seçicilər Kollegiyası ölkə parlamentinin deputatlarından və bölgələrin təmsilçi orqanlarının nümayəndələrindən ibarətdir.
Gürcüstanda hökuməti 150 nəfərlik parlamentdə azı 76 mandatı olan partiya qurur. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası qalib gəlib.
2024-cü il oktyabrın 26-da keçirilmiş parlament seçkisində Gürcü Arzusu 89 mandata sahib çıxıb. 61 mandat müxalifətə qismət olub, ancaq bu qüvvələr yeni parlamenti boykot edir, prezident seçkisini də qanunsuz sayır. 2018-ci ilin ümumxalq səsverməsində prezident mandatı almış Salome Zurabişvili də bu məsələdə müxaliflərə həmrəydir.
