Almaniya yeni seçki yoluna çıxdı
Almaniya prezidenti Frank-Valter Ştaynmayer dekabrın 27-də parlamenti – Bundestaqı buraxaraq 2025-ci il fevralın 23-nə növbədənkənar seçki təyin edib.
2021-ci ilin parlament seçkisindən sonra Sosial Demokrat Partiyası, Yaşıllar Partiyası və Azad Demokrat Partiyası koalisiya qurub, Sosial Demokrat Partiyasının təmsilçisi Olaf Şolts hökumət başçısı – kansler seçilib. 2024-cü ilin noyabrında Azad Demokrat Partiyası koalisiyanı tərk edib, hökumət böhranı yaranıb. Bundestaq dekabrın 16-da hökumətə etimadsızlıq göstərib, bununla da növbədənkənar parlament seçkisi qaçılmaz olub.
Almaniyada prezidenti parlamentin deputatları və bölgələrin nümayəndələrindən ibarət Federal Məclis seçir. Sosial Demokrat Partiyasının üzvü olan Frank-Valter Ştaynmayer 2017 və 2022-ci illərdə dövlət başçısı mandatı alıb.
