Təyyarə qəzası
“Azərbaycan Hava Yolları”nın “Embraer 190” sərnişin təyyarəsi qəzaya uğrayıb. Rəsmi məlumata görə, dekabrın 25-i səhər paytaxt Bakıdan Çeçen Respublikasının (Rusiya) baş şəhəri Qroznıya uçan təyyarə Qazaxıstanın Aktau şəhəri yaxınlığında yerə düşüb. Təyyarədə 62 sərnişin, 5 ekipaj üzvü olub. 38 nəfərin həlak olduğu bildirilir.
Qəzanın səbəblərinin araşdırılması üçün dövlət komissiyası yaradılıb. Baş nazir Əli Əsədovun sədrlik etdiyi komissiyaya Şahin Mustafayev (baş nazirin müavini), Rəşad Nəbiyev (rəqəmsal inkişaf və nəqliyyat naziri), Samir Rzayev (“Azərbaycan Hava Yolları” Qapalı Səhmdar Cəmiyyətinin prezidenti), Ceyhun Bayramov (xarici işlər naziri), Kamran Əliyev (baş prokuror), Vilayət Eyvazov (daxili işlər naziri), Əli Nağıyev (Dövlət Təhlükəsizliyi Xidmətinin rəisi), Kəmaləddin Heydərov (fövqəladə hallar naziri), Teymur Musayev (səhiyyə naziri), Sahil Babayev (əmək və əhalinin sosial müdafiəsi naziri), Arif Məmmədov (Dövlət Mülki Aviasiya Agentliyinin direktoru) daxildir.
Prezident İlham Əliyev dekabrın 26-nın ölkədə matəm elan edilməsinə sərəncam verib.
