Pensiya şərti də yenilənir
2025-ci il fevralın 1-dən Azərbaycanda əmək pensiyasının minimum məbləği 280 manatdan 320 manata yüksəlir. Bu, pensiya təyinatı şərtində də yenilik deməkdir.
Ölkədə kişilər 65, qadınlar 64 yaşda pensiyaya çıxır (2026-cı il iyulun 1-dən qadınların da pensiya yaşı 65 olacaq). Pensiya təyinatı üçün ya 25 il sığorta stajı, ya da minimum pensiya kapitalı gərəkdir. Minimum pensiya kapitalı minimum pensiya göstəricisinin gözlənən pensiya ödənişi müddətinin (12 il) aylarının sayına (144) vurulmasından yaranır və 2025-ci il fevralın 1-dən 46080 manat müəyyən ediləcək.
2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə aylıq müavinət verilir.
Azərbaycanda pensiyalar orta aylıq nominal əməkhaqqının illik artım tempinə uyğun indeksləşdirilir. Rəsmi statistikaya görə, 2024-cü ilin yanvar-oktyabr aylarında muzdlu işçilərin orta maaşı 2023-cü ilin eyni dövrünə nəzərən 7,8 faiz artıb. Yekun rəqəm 2025-ci ilin fevralında açıqlanacaq.
2024-cü il oktyabrın 1-nə Dövlət Sosial Müdafiə Fondunda 1 milyon 98,5 min nəfər pensiyaçı qeydiyyatda olub.
