İki jurnalistin cəzası dəyişdi
Ali Məhkəmə məhbus jurnalistlər Əvəz Zeynallı və Elnur Şükürovun şikayətlərinə baxıb. Dekabrın 18-də yayılan məlumata görə, Əvəz Zeynallının cəzası 2 ay, Elnur Şükürovun cəzası 1 il azaldılıb.
Əvəz Zeynallı “Xural” internet televiziyasının, Elnur Şükürov “Səda” internet televiziyasının rəhbəridir. Bakı Ağır Cinayətlər Məhkəməsi fevralın 26-da Əvəz Zeynallıya 9 il, Elnur Şükürova 4 il azadlıqdan məhrumetmə cəzaları kəsmiş, aprelin 23-də Bakı Apellyasiya Məhkəməsi hökmləri qüvvədə saxlamışdı.
Əvəz Zeynallı 2022-ci il sentyabrın 10-da külli miqdarda rüşvət almaq ittihamı ilə tutulub. Sentyabrın 21-də Əvəz Zeynallıya vəzifəli şəxsin qərarına qanunsuz təsir göstərmə (nüfuz alveri) ittihamı da irəli sürülüb. Bu iş üzrə Elnur Şükürov (2022-ci il sentyabrın 14-də tutulub) da məsuliyyətə cəlb olunub.
