Almaniya növbədənkənar seçkiyə gedir
Almaniya parlamenti – Bundestaq dekabrın 16-da hökumətə etimadsızlıq göstərib. Bu, növbədənkənar parlament seçkisinə yaşıl işıq deməkdir.
Parlament idarə üsullu Almaniyada kansler hökumət başçısı sayılır. 2021-ci ilin parlament seçkisindən sonra Sosial Demokrat Partiyası, Yaşıllar Partiyası və Azad Demokrat Partiyası hökumət qurub, Olaf Şolts kansler seçilib.
2024-cü ilin noyabrında Azad Demokrat Partiyası koalisiyanı tərk edib, hökumət böhranı yaranıb. Hazırda 733 üzvü olan parlamentdə hakim qüvvənin 325, müxalifətin 408 mandatı var.
Sosial Demokrat Partiyasının təmsilçisi Olaf Şolts 2021-ci il dekabrın 8-dən kanslerdir. İlkin məlumata görə, növbədənkənar parlament seçkisi 2025-ci ilin fevralında keçiriləcək.
