Diplomatların qanunu
Milli Məclis “Diplomatik xidmət haqqında” yeni qanun layihəsini müzakirə edir. Layihədə diplomatik vəzifələr belə sıralanır: müvafiq icra hakimiyyəti orqanının müəyyən etdiyi orqanda (Xarici İşlər Nazirliyi – red.) – orqanın (qurumun) rəhbəri; orqanın (qurumun) rəhbərinin müavini; xüsusi tapşırıqlar üzrə səfir, idarə rəisi; idarə rəisinin müavini; müşavir; şöbə müdiri; birinci katib; ikinci katib; üçüncü katib; attaşe; diplomatik nümayəndəlikdə – fövqəladə və səlahiyyətli səfir, təmsilçilik ofisinin rəhbəri, daimi nümayəndə, nümayəndə; səfirin müavini, daimi nümayəndənin müavini; müşavir-elçi; müşavir; birinci katib; ikinci katib; üçüncü katib; attaşe, maliyyə məsələləri üzrə attaşe; konsulluqda – baş konsul; konsul; vitse-konsul; konsul agenti, maliyyə məsələləri üzrə attaşe.
Fövqəladə və səlahiyyətli səfirin və təmsilçilik ofisinin rəhbərinin qəbul edən dövlətdə, daimi nümayəndənin və nümayəndənin beynəlxalq təşkilatda fasiləsiz xidmət müddəti 5 il, baş konsulun və səfirin müavininin qəbul edən dövlətdə, daimi nümayəndənin müavininin isə beynəlxalq təşkilatda fasiləsiz xidmət müddəti 4 il müəyyən olunur. Onlar xidmət müddətindən artıq fəaliyyətini davam etdirə və ya həmin müddətdən əvvəl geri çağırıla bilərlər.
Diplomatik nümayəndəlikdə və konsulluqda vəzifəyə təyin edilən diplomatik xidmət orqanı əməkdaşlarının fasiləsiz xidmət müddəti 3 ildir. Bu müddət 1 ilədək uzadıla bilər.
