Cəbhəçi işləri
AXCP-nin 11 üzvünə azadlıqdan məhrumetmə cəzası kəsilib. Onların 7-si külli miqdarda narkotik vasitə saxlamada təqsirli bilinib. 2021-ci ildə tutulan Mütəllim Orucova 7 il, Şahin Hacıyevə 6 il, 2022-ci ildə tutulan Razi Alışova 5 il 6 ay, Pünhan Kərimova 5 il, 2023-cü ildə tutulan Elbəyi Kərimova 6 il, Elnur Həsənova 3 il, 2024-cü ildə tutulan Sahib Məmmədzadəyə 6 il 6 ay həbs verilib.
Mehman Əliyev 2024-cü ildə eyni ittihamla tutulub.
2020-ci ildə tutulan Niyaməddin Əhmədov 13 il həbs cəzası alıb. Hökm terrorçuluğu maliyyələşdirmə, qanunla mülki dövriyyədə olmasına yol verilməyən (mülki dövriyyədən çıxarılmış) əşyaları qanunsuz olaraq hazırlama, əldə etmə, saxlama, daşıma, gəzdirmə, başqasına vermə və ya satma, dövlət əleyhinə yönələn açıq çağırışlar etməyə hazırlıq ittihamlarına əsaslanıb.
2021-ci ildə tutulan Aqil Hümmətov qəsdən sağlamlığa ağır zərər vurmada ittiham olunaraq 10 il həbsə məhkum edilib.
2023-cü ildə tutulan Zamin Salayevə 4 il həbs cəzası kəsilib. O, silah tətbiq etməklə xuliqanlıqda təqsirli bilinib.
2023-cü ildə tutulan Elxan Əliyevə külli miqdarda ziyan vurmaqla dələduzluq, hüquq verən rəsmi sənədi saxtalaşdırma və bilə-bilə saxta sənədlərdən istifadə etmə ittihamı ilə 5 il həbs cəzası verilib.
1989-cu ildə yaradılan Azərbaycan Xalq Cəbhəsi (AXC) 1995-ci ildə partiyaya çevrilib. 2000-ci ildən AXCP-yə Əli Kərimli liderlik edir.
