Bəşərin taleyi
Suriya prezidenti postunu itirmiş Bəşər Əsəd ailəsi ilə birgə Moskvaya sığınıb. Bəşər Əsədin Rusiya paytaxtında olduğu xəbəri dekabrın 8-i axşam yayılıb.
Suriyada 2011-ci ilin mart ayında hakimiyyətə qarşı başlayan xalq hərəkatı sonradan vətəndaş müharibəsinə çevrilib. Rusiya hakim rejimə dəstək verib, 2015-ci ildə Suriyaya qoşun yeridib.
2020-ci ildən Suriyada kövrək atəşkəs qüvvədə olub. 2024-cü il noyabrın 27-dən müxalif qüvvələrin hakim rejimə qarşı yeni hərbi həmləsi başlayıb, dekabrın 8-də paytaxt Dəməşq ələ keçirilib, Bəşər Əsədin ölkəni tərk etdiyi bəyan olunub.
Bəşər Əsəd prezident postunu 2000-ci ildən tutub. 1971-2000-ci illərdə isə Suriyaya onun atası Hafiz Əsəd prezidentlik edib.
