Rumıniyada prezident seçkisi dayandırıldı
Rumıniyada prezident seçkisinin birinci turunun nəticələri ləğv edilib. Qərarı dekabrın 6-da ölkənin Konstitusiya Məhkəməsi verib.
Noyabrın 24-də keçirilmiş ilk turda 13 iddiaçı yarışmış, partiyasız namizəd Kalin Corcesku 22,94 faiz, Rumıniyanın Xilası İttifaqının təmsilçisi Yelena Laskoni 19,18 faiz səslə önə çıxmışdılar. İkinci tur dekabrın 8-də olmalı idi. Konstitusiya Məhkəməsinin 6 dekabr qərarı prezident seçkisi kampaniyasının yenidən təşkil olunmasını nəzərdə tutur.
İddialara görə, Rusiyaya meyilli siyasətçi kimi tanınan Kalin Corceskunun seçki kampaniyası xaricdən qanunsuz maliyyələşib və bu amil ilk turun nəticəsinə təsir göstərib.
Prezidentin səlahiyyət müddəti beş ildir. 2014 və 2019-cu illərdə Klaus Yohannis dövlət başçısı seçilib.
Ölkədə hökuməti dörd ildən bir proporsional üsulla (partiya siyahıları üzrə) seçilən parlamentdə çoxluq əldə edən siyasi qüvvə qurur.
Dekabrın 1-də keçirilmiş parlament seçkisindən sonra 136 nəfərlik Senat və 331 nəfərlik Deputatlar Palatasında mandatlar belə bölünüb: Sosial Demokrat Partiyası – 36 senator, 86 deputat; Rumınların Birliyi Alyansı – 28 senator, 64 deputat; Milli Liberal Partiya – 22 senator, 49 deputat; Rumıniyanın Xilası İttifaqı – 19 senator, 40 deputat; SOS Partiyası – 12 senator, 27 deputat; Rumıniya Macarlarının Demokratik İttifaqı – 10 senator, 22 deputat; Gənclər Partiyası – 9 senator, 24 deputat; milli azlıq partiyaları – 19 deputat.
