Hüseyn Abdullayevə cəza təklifi
Bakı Ağır Cinayətlər Məhkəməsi sabiq deputat Hüseyn Abdullayevin yeni mühakiməsini bitirmək üzrədir. Dekabrın 5-də keçirilən iclasda dövlət ittihamçısı Hüseyn Abdullayevə 10 il müddətində azadlıqdan məhrumetmə cəzası verilməsini təklif edib.
Hüseyn Abdullayev cinayət yolu ilə əldə edilmiş xeyli miqdarda əmlakı leqallaşdırmada təqsirli bilinir. Bu ittiham ona 2024-cü ilin martında irəli sürülüb.
1967-ci il təvəllüdlü Hüseyn Abdullayev hakimiyyətə bağlı iş adamı kimi tanınıb. 2005-ci ildə parlamentin deputatı seçilib. Milli Məclisin 16 mart 2007-ci il iclasında onun deputat Fəzail Ağamalı ilə davası düşüb. Martın 19-da Milli Məclis Hüseyn Abdullayevin deputat toxunulmazlığını ləğv edib. Ona xuliqanlıq və döymə ittihamları ilə cinayət işi qaldırılıb. Həmin gün Hüseyn Abdullayev həbs edilib. Mayın 18-də 2 il müddətinə şərti azadlıqdan məhrumetmə cəzası alan Hüseyn Abdullayev azadlığa buraxılıb, ardınca deputatlıqdan məhrum edilib.
2012-ci ildə Hüseyn Abdullayev Almaniyaya mühacirət edib və hakimiyyətə qarşı sərt çıxışlara başlayıb.
2013-cü ildə Azərbaycanda Hüseyn Abdullayevə vergidən yayınma ittihamı ilə cinayət işi başlanıb və o, beynəlxalq axtarışa verilib.
2016-cı ildə ona qanunsuz sahibkarlıq, 2018-ci ildə dələduzluq və hədə-qorxu ilə tələb etmə ittihamları da irəli sürülüb.
2018-ci il aprelin 22-də sabiq deputat Türkiyədə tutularaq ölkəyə gətirilib.
2019-cu il oktyabrın 1-də Hüseyn Abdullayevə 6 il azadlıqdan məhrumetmə cəzası kəsilib.
