ABŞ-ın səfiri Azərbaycandan gedir
ABŞ-ın Azərbaycandakı səfiri Mark Libbi dekabrın 3-də istefa verdiyini açıqlayıb. Diplomat bəyanatında qeyd edib ki, xərçəng xəstəliyindən əziyyət çəkir, sağlamlığı üzərində diqqət cəmləmək üçün evə qayıtmalıdır: “2024-cü ili başa vurduqdan sonra istefaya çıxacağam”.
Bakıdakı səlahiyyət müddəti ərzində görülmüş işlərlə qürur duyduğunu vurğulayan diplomat əlavə edib ki, Azərbaycanda insan haqlarının qorunmasını təşviq etmək və Cənubi Qafqazda davamlı, layiqli sülhə kömək etmək üçün görüləcək işlər çoxdur: “İnanıram ki, bizim ikitərəfli münasibətlərimizdə çətinliklə qazanılmış irəliləyişlər qarşıdan gələn həftələr, aylar və illərdə daha yaxşı və daha uğurlu əməkdaşlığın təməlini qoyur. Mən ABŞ-Azərbaycan münasibətlərinin gələcəyinə böyük nikbinlik hissi ilə buranı tərk edirəm”.
Mark Libbi 2024-cü il yanvarın 18-də etimadnaməsini prezident İlham Əliyevə təqdim edərək rəsmən fəaliyyətə başlamışdı.
ABŞ-ın Azərbaycanda birinci səfiri Riçard Mayls olub. O, 1992-1993-cü illərdə bu postu tutub.
İkinci səfir Riçard Kozlariç 1994-1997-ci illərdə, üçüncü səfir Stenli Eskudero 1997-2000-ci illərdə çalışıb.
Sonrakı səfirlər bu şəxslərdir: Ross Uilson (2000-2003), Rino Harniş (2003-2006), Enn Dörsi (2006-2009), Metyu Brayza (2011-2012), Riçard Morninqstar (2012-2014), Robert Sekuta (2015-2018), Li Litzenberqer (2019-2022).
