Hökm
Nəsimi Rayon Məhkəməsi vətəndaş Aydın Əliyevin AXCP sədri Əli Kərimliyə qarşı xüsusi ittiham qaydasında şikayətinə baxışı başa çatdırıb. Dekabrın 2-də çıxarılan hökmlə Əli Kərimli böhtanda təqsirli bilinərək 1500 manat cərimələnib.
Aydın Əliyev 2015-ci ildən AXCP Mərkəzi Nəzarət-Təftiş Komissiyasının sədri olub, 2019-cu ildə partiya üzvlüyündən çıxarılıb, ancaq 2022-ci ildə məhkəmə həmin qərarı ləğv edib.
2024-cü il iyulun 5-də Nəsimi Rayon Məhkəməsi Aydın Əliyevin iddiası əsasında AXCP-nin 24 iyun 2023-cü il qurultayının nəticələrini etibarsız sayıb. Əli Kərimli bununla bağlı şərhində Aydın Əliyevin bir vaxt partiyadan qurumun siyasi kursundan yayındığına, hakimiyyətlə əməkdaşlığa görə xaric edildiyini vurğulayıb. Aydın Əliyev bu şərhi böhtan kimi dəyərləndirib.
Azərbaycan Xalq Cəbhəsi 1989-cu ildə yaradılıb, 1995-ci ildə partiyaya çevrilib. Əli Kərimli Əbülfəz Elçibəyin prezidentliyi zamanı (1992-1993-cü illər) əvvəl Prezident Aparatının şöbə müdiri, sonra dövlət katibi vəzifələrində çalışıb.
AXC (AXCP) sədrinin müavini, birinci müavini olub. 1995 və 2000-ci illərdə Milli Məclisin deputatı seçilib. AXCP-yə 2000-ci ildən rəhbərlik edir.
