Yeni parlament rəsmiləşdi
Noyabrın 25-də Gürcüstanın yeni parlamentinin ilk iclası keçirilib, Şalva Papuaşvili sədr seçilib.
Baş nazir postuna İrakli Kobaxidze gətirilir.
Şalva Papuaşvili 2021-ci il dekabrın 29-dan parlamentə sədrlik edib, İrakli Kobaxidze 2024-cü il fevralın 8-dən baş nazir kürsüsünü tutub.
Rəsmi nəticələrə görə, oktyabrın 26-da keçirilmiş parlament seçkisində hakim Gürcü Arzusu – Demokratik Gürcüstan Partiyası 150 nəfərlik parlamentdə 89 mandata sahib çıxıb. Qalan 61 mandat müxalifətə qismət olub: Yeniliklər koalisiyası 19, Birlik – Milli Hərəkat koalisiyası 16, Güclü Gürcüstan koalisiyası 14, Gürcüstan Uğrunda Partiyası 12 yer götürüb. Bu qüvvələr yeni parlamenti boykot edir.
Gürcüstanda hökuməti proporsional üsulla (partiya siyahıları üzrə) seçilən qanunverici orqanda azı 76 mandatı olan partiya qurur. 2012, 2016 və 2020-ci illərin parlament seçkilərində də Gürcü Arzusu qalib gəlib.
Hökumətə baş nazirin müavini, iqtisadiyyat və davamlı inkişaf naziri; xarici işlər naziri; müdafiə naziri; ədliyyə naziri; daxili işlər naziri; maliyyə naziri; ətraf mühiti mühafizə və kənd təsərrüfatı naziri; regional inkişaf və infrastruktur naziri; təhsil, elm və gənclər naziri; mədəniyyət və idman naziri; məcburi köçkünlərlə iş, əmək, səhiyyə və sosial müdafiə naziri; barışıq məsələləri və vətəndaş bərabərliyi üzrə dövlət naziri daxildir.
