Aşağıya…
Azərbaycan milli komandası UEFA Millətlər Liqasının 2024-2025 mövsümü ilə vidalaşıb. C liqasının 1-ci qrupunda yarışan milli 1 xalla son pilləni tutaraq D liqasına yuvarlanıb. Bu, yığmanın Millətlər Liqasında ən pis göstəricisidir. Milli bir yol D liqasında qrup ikincisi olmuş, C liqasında bir yol üçüncü, bir yol ikinci yerdə qərarlaşmışdı.
Beynəlxalq turnirlərə 1994-cü ildən qatılan Azərbaycan millisi dörd Avropa çempionatının seçmə mərhələsini qrupda sonuncu, dördünü sondan əvvəlki yerdə bitirib.
Dörd dünya çempionatının seçmə mərhələsində yığma qrupda sonuncu, ikisində sondan əvvəlki, birində axırdan üçüncü pilləni tutub.
Millətlər Liqasının 2024-2025 mövsümünün qrup mərhələsinin yekunlarına görə, A liqasından Portuqaliya, Xorvatiya, Fransa, İtaliya, Almaniya, Niderland, İspaniya, Danimarka 1/4 finala çıxır. Həmin mərhələnin matçları 2025-ci ilin martında, yarımfinallar və final iyun ayında keçiriləcək.
Çexiya, İngiltərə, Norveç, Uels A liqasına, İsveç, Rumıniya, Şimali İrlandiya, Şimali Makedoniya B liqasına, San Marino, Moldova C liqasına yüksəlir.
Polşa, İsrail, Bosniya, İsveçrə B liqasına, Albaniya, Finlandiya, Qazaxıstan, Monteneqro C liqasına, Azərbaycan, Litva D liqasına düşür.
Şotlandiya, Belçika, Macarıstan, Serbiya, Ukrayna, Yunanıstan, Avstriya, Türkiyə A və B liqaları üzrə, Gürcüstan, İrlandiya, Sloveniya, İslandiya, Slovakiya, Kosovo, Bolqarıstan, Ermənistan B və C liqaları üzrə düşmə/yüksəlmə oyunlarına gedir. Bu mərhələ 2025-ci ilin martına təyin olunub.
C və D liqaları üzrə düşmə/yüksəlmə oyunlarına Lüksemburq, Latviya, Cəbəllütariq, Malta vəsiqə alır. Bu mərhələ 2026-cı ilin martında oynanacaq.
Millətlər Liqası 2018-ci ildən keçirilir. 2018-2019 mövsümünü Portuqaliya, 2020-2021 mövsümünü Fransa, 2022-2023 mövsümünü İspaniya udub.
