Artım və azalmalar
Yanvar-oktyabr ayları Azərbaycanda 103 milyard 495,8 milyon manatlıq, 2023-cü ilin eyni dövrü ilə müqayisədə 4,9 faiz çox ümumi daxili məhsul (ÜDM) istehsal olunub. Hesabatı yayan Dövlət Statistika Komitəsi bildirir ki, neft-qaz sektorunda 1,7 faiz, qeyri-neft/qaz sektorunda 6,8 faiz artım qeydə alınıb, adambaşına 10146,5 manatlıq ÜDM düşüb.
Açıqlamaya görə, on ayda 14 milyard 391,1 milyon manat məbləğində sərmayə rəsmiləşib, neft-qaz sektoruna investisiyalar 9,1 faiz, qeyri-neft/qaz sektoruna 2 faiz azalıb.
Sənayedə yüksəliş 2,2 faiz (neft-qaz sektorunda 1,5 faiz, qeyri-neft/qaz sektorunda 8,7 faiz) göstərilir.
Qeyd olunur ki, yanvar-oktyabr aylarında pərakəndə ticarət şəbəkəsində istehlakçılara 26 milyard 472,8 milyon manatlıq ərzaq məhsulları, içkilər və tütün məmulatları, 21 milyard 870,2 milyon manatlıq qeyri-ərzaq malları satılıb, alınan mallara xərclənən vəsaitin 50,5 faizi ərzaq məhsullarının, 4,3 faizi içkilər və tütün məmulatlarının payına düşüb.
Yanvar-sentyabr aylarında xarici ticarət dövriyyəsinin real ifadədə 4,9 faiz, o cümlədən idxalın 1,2 faiz, ixracın 7,1 faiz azaldığı vurğulanır.
Rəsmi məlumata əsasən, oktyabrın 1-nə muzdlu işçilərin orta aylıq nominal əməkhaqqı 993 manata çatıb, oktyabrda istehlak qiymətləri 2023-cü ilin eyni ayına nisbətən 3,4 faiz artıb, qida məhsulları, içkilər və tütün məmulatları 2,6 faiz, qeyri-qida məhsulları 2,1 faiz, ödənişli xidmətlər 5,8 faiz bahalaşıb.
