Tramp
Sabiq dövlət başçısı, Respublikaçılar Partiyasının ABŞ prezidentliyinə namizədi Donald Tramp noyabrın 5-də keçirilmiş ümumxalq səsverməsində 538 nəfərlik Seçicilər Kollegiyasına 292 nümayəndə əldə edir.
Demokratlar Partiyasının namizədi, vitse-prezident Kamala Harris 224 nümayəndə ilə göstərilir.
Qələbə üçün 270 nümayəndə tələb olunur.
Prezidenti 50 ştat və 1 federal dairəni təmsil edən Seçicilər Kollegiyası seçir, bu barədə qərarı Konqres (Nümayəndələr Palatası ilə Senatın birgə iclası) təsdiqləyir.
Donald Tramp 1946-cı il iyunun 14-də doğulub. Orta təhsilini Nyu-York Hərbi Akademiyasının internat məktəbində alıb, Pensilvaniya Universitetinin Uorton Biznes Məktəbini bitirib, tikinti maqnatı kimi ad çıxarıb.
1999-cu ildən Respublikaçılar Partiyasının üzvüdür.
2016-cı il noyabrın 8-də keçirilmiş ümumxalq seçkisində Donald Tramp Demokratlar Partiyasından Hillari Klintonu məğlub edib, 2017-ci il yanvarın 20-dən prezidentliyə başlayıb.
2020-ci il noyabrın 3-də keçirilmiş prezident seçkisinin ümumxalq səsverməsi mərhələsində Donald Tramp Demokratlar Partiyasının namizədi Cozef Baydenə uduzub.
1789-cu ildən bəri ABŞ prezidenti vəzifəsində 45 şəxs əyləşib. Ölkədə eyni şəxs maksimum iki dəfə prezident seçilə bilər. Yalnız Franklin Ruzvelt dövlət başçısı postuna dörd dəfə (1932, 1936, 1940, 1944-cü illərdə) mandat alıb.
2021-ci il yanvarın 20-dən dövlət başçısı olan Cozef Bayden bir müddətlə kifayətlənib.
