ABŞ-da prezident seçkisi
ABŞ-da prezident seçkisinin ilk raundunun nəticələri açıqlanır. Hesabata görə, sabiq dövlət başçısı, Respublikaçılar Partiyasının namizədi Donald Tramp noyabrın 5-də keçirilmiş ümumxalq səsverməsində Seçicilər Kollegiyasına 276 nümayəndə əldə edir.
Demokratlar Partiyasının namizədi Kamala Harrisin 223 nümayəndə qazandığı bildirilir.
Prezidenti 538 nəfərlik Seçicilər Kollegiyası seçir, bu barədə qərar Konqresin iclasında təsdiqlənir. Qələbə üçün 270 səs tələb olunur.
1946-cı il təvəllüdlü Donald Tramp 2017-ci il yanvarın 20-dən 2021-ci il yanvarın 20-dək prezidentlik edib.
Prezidentlə birgə vitse-prezident də seçilir. Respublikaçılar vitse-prezident kimi 1984-cü il təvəllüdlü Ceyms Devis (Cey Di) Vensi görmək istəyir.
1964-cü il təvəllüdlü Kamala Harris Kaliforniya ştatının prokurorluq orqanlarında məsul vəzifələr tutub, o cümlədən ştatın baş prokuroru olub. 2016-cı ildə Konqresin yuxarı palatasının – Senatın üzvü seçilib. 2021-ci il yanvarın 20-dən vitse-prezidentdir.
Demokratların vitse-prezident postuna namizədi 1964-cü il təvəllüdlü Timoti Ceyms (Tim) Uolzdur.
Vitse-prezident Senata sədrlik edir. Dövlət başçısı vəzifədən vaxtından əvvəl getdikdə onun səlahiyyətləri vitse-prezidentə keçir.
ABŞ-da eyni şəxs maksimum iki dəfə prezident seçilə bilər. Demokratlar Partiyasını təmsil edən indiki prezident Cozef Bayden bir müddətlə kifayətlənib. 1942-ci il təvəllüdlü Cozef Bayden 2009-2017-ci illərdə vitse-prezident postunu tutub, 2021-ci il yanvarın 20-dən prezidentdir.
