Hakim partiya önə çıxır
Özbəkistan parlamentinin – Ali Məclisin aşağı palatasına oktyabrın 27-də keçirilmiş seçkinin ilkin nəticələri bəlli olub. Rəsmi hesabata görə, hakim Liberal Demokrat Partiyası 150 yerlik Qanunverici Palataya 64 mandatla düşür, qalan yerlər dörd partiya arasında bölünür.
75 nəfəri majoritar üsulla (dairələr üzrə), 75 nəfəri proporsional üsulla (partiya siyahıları üzrə) seçilən Qanunverici Palatanın prezident qarşısında Nazirlər Kabinetini istefaya göndərilməsi barədə məsələ qaldırmaq səlahiyyəti var.
Liberal Demokrat Partiyası prezident Şövkət Mirziyayevə bağlı siyasi qüvvədir.
1957-ci il təvəllüdlü Şövkət Mirziyayev 2016-cı il sentyabrın 8-dən baş nazir kimi Özbəkistan prezidenti səlahiyyətlərini icra edib, həmin il və 2021-ci ildə 5 il müddətinə prezident seçilib.
2023-cü ildə prezidentin səlahiyyət müddəti 7 ilə qaldırılıb və Şövkət Mirziyayev növbədənkənar prezident seçkisində yeni mandat alıb.
