Moldovanın seçimi
Moldovada oktyabrın 20-də keçirilmiş referendumun və prezident seçkisinin ilkin nəticələri açıqlanır. Rəsmi hesabata görə, seçicilərin 50 faizindən bir qədər çoxu Moldovanın Avropa İttifaqına üzvlüyünün konstitusiyada hədəf kimi göstərilməsi ideyasına dəstək verir.
11 iddiaçının qatıldığı prezident seçkisində isə 42 faizə yaxın səslə dövlət başçısı Mayya Sandu öndə göstərilir. O, noyabrın 3-nə təyin olunmuş ikinci turda müxalif Sosialist Partiyasının namizədi, sabiq baş prokuror Aleksandr Stoyanoqlo ilə yarışacaq. 1967-ci il təvəllüdlü Aleksandr Stoyanoqlo qaqauzdur.
Mayya Sandu 1972-ci ildə doğulub. Maarif naziri, baş nazir postlarını tutub, 2020-ci il noyabrın 15-də prezident seçilib, dekabrın 24-də səlahiyyətlərinin icrasına başlayıb.
Parlament respublikası olan Moldovada hökuməti 101 yerlik qanunverici orqanda mandatların yarıdan çoxuna sahib olan partiya qurur. Mayya Sanduya bağlı Hərəkət və Həmrəylik Partiyası parlamentdə 62 mandatla təmsil olunur.
Prezidentin səlahiyyət müddəti 4 ildir.
Moldovanın Dnestryanı bölgəsi 1990-cı ildə ölkədən ayrıldığını elan edib. Bununla bağlı yaranan silahlı münaqişədə Rusiya qoşunları separatçı rejimin tərəfini tutub və o zamandan bəri ərazini nəzarətdə saxlayır.
Türkdilli qaqauzların sıx yaşadığı əraziyə 1994-cü ildə muxtariyyət statusu verilib. Qaqauz Muxtar Ərazi Qurumu (Qaqauz Yeri) Rusiyaya yaxın sayılır.
Moldova 2022-ci il iyunun 23-dən Avropa İttifaqı üzvlüyünə namizəddir. 1957-ci ildə yaradılan Avropa İttifaqı 27 ölkəni bir araya gətirir: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
