Liqa raundlarında
UEFA Çempionlar Liqası (1) və Avropa Liqasının (2) liqa raundlarında səkkiz turun ikisi, Konfrans Liqasının (3) liqa raundunda altı turun biri arxada qalıb. Hər birində 36 komandanın yarışdığı liqa raundlarında ilk 8 pilləni tutanlar 1/8 finala, 9-24-cü yerləri tutanlar 1/16 finala çıxacaq.
Avropa Liqasında yer alan Azərbaycan təmsilçisi “Qarabağ” xalsızdır, 34-cü pillədədir.
Reqlamentə görə, yekunda xallar bərabər olarsa, ardıcıllıqla bu meyarlar əsas götürülür: top fərqi, qol sayı, səfərdə qol sayı, qələbə sayı, rəqib meydanında qələbə sayı, rəqiblərin göstəriciləri (xal, top fərqi, top sayı), cəza balı (sarı və qırmızı vərəqələr), komandanın reytinqi.
Azərbaycan 55 üzvü olan UEFA-nın klub reytinqində 28-ci pillədədir. Reytinq turnirlərin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Liqa mərhələsindən başlayaraq finala qədər bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 2,375 əmsal qazanıb.
