Vidadi İsgəndərli keçinib
Mühacir hüquqşünas Vidadi İsgəndərli oktyabrın 1-də keçinib. Xəbəri “Turan” agentliyi yayıb.
Vidadi İsgəndərli sentyabrın 29-u Fransanın Müluz şəhərində, yaşadığı evdə bıçaqlanmış, çoxsaylı xəsarətlərlə xəstəxanaya yerləşdirilmişdi. Məlumata görə, səhər saat 7-də Vidadi İsgəndərlinin evinə üç maskalı şəxs basqın edib, onların biri hüquqşünasa 20-dən çox bıçaq zərbəsi endirib.
2011-ci ilin aprelindən 2012-ci ilin dekabrınadək seçki hüquqlarının həyata keçirilməsinə mane olma, seçki komissiyalarının işinə müdaxilə etmə, döymə ittihamları ilə həbsdə yatmış Vidadi İsgəndərli 2015-ci ildən Fransada məskunlaşmışdı, Azərbaycan hakimiyyətini sərt tənqidləri ilə tanınırdı.
Hüquqşünas 2022-ci il iyunun 15-də də Müluz şəhərində hücuma məruz qalmış, döyülmüşdü.
