Yenilənmiş şəhər günləri
Prezident İlham Əliyev işğaldan azad olunmuş ərazilər üzrə şəhər günləri sərəncamını yeniləyib. Yeniliyə görə, şəhər günləri belə sıralanır:
26 avqust – Laçın şəhəri günü
20 sentyabr – Xankəndi, Xocalı, Xocavənd və Ağdərə şəhərləri günü
4 oktyabr – Cəbrayıl şəhəri günü
17 oktyabr – Füzuli şəhəri günü
20 oktyabr – Zəngilan şəhəri günü
25 oktyabr – Qubadlı şəhəri günü
8 noyabr – Şuşa şəhəri günü
20 noyabr – Ağdam şəhəri günü
25 noyabr – Kəlbəcər şəhəri günü.
Ermənistan 1988-1994-cü illərin təcavüzündə Azərbaycanın cənub-qərbini və Sədərək rayonunun 1, Qazax rayonunun 7 kəndini işğal edib, Qarabağda separatçı rejim qurub.
2020-ci il sentyabrın 27-dən Azərbaycanın apardığı hərbi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Ağdərə və Laçın rayonlarının bir çox məntəqəsi azad olunub. Cəbrayıl şəhəri oktyabrın 4-də, Füzuli şəhəri oktyabrın 17-də, Zəngilan şəhəri oktyabrın 20-də, Qubadlı şəhəri oktyabrın 25-də, Şuşa şəhəri noyabrın 8-də işğaldan qurtulub.
Noyabrın 10-na keçən gecə hərbi əməliyyatlar dayandırılıb, noyabrın 20-də Ağdam rayonu, noyabrın 25-də Kəlbəcər rayonu, dekabrın 1-də Laçın rayonu (Laçın şəhəri və rayonun 6 kəndi istisna olmaqla) Azərbaycana qaytarılıb.
2022-ci il avqustun 26-da Laçın rayonu tam azad edilib.
2023-cü il sentyabrın 19-da Azərbaycan Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd və Ağdərə rayonlarının bir hissəsinə nəzarət edən işğalçı rejimə qarşı hərbi əməliyyata başlayıb, ertəsi gün rejim tərksilah olmaq öhdəliyi götürüb, sentyabrın 24-dən ermənilərin Qarabağdan kütləvi köçü başlayıb, sentyabrın 28-də rejim özünü buraxıb.
2024-cü il mayın 24-də Ermənistan Qazaxın Aşağı Əskipara, Bağanıs Ayrım, Xeyrimli, Qızılhacılı kəndlərindən çəkilib.
Sədərəkin Kərki, Qazaxın Barxudarlı, Sofulu, Yuxarı Əskipara kəndləri Ermənistan ərazisi ilə əhatə olunmuş (anklav) vəziyyətdədir.
Sentyabrın 27-si Azərbaycanda işğal altında olan torpaqlarının azad edilməsi uğrunda həlak olmuş şəhidlərin xatirəsini yad etmə günü – Anım Günü kimi rəsmiləşib.
Şuşa şəhərinin işğaldan azad edildiyi 8 noyabr dövlət bayramı – Zəfər Günüdür.
