Maliyyə yardımı alacaq partiyalar
Sentyabrın 1-də keçirilmiş parlament seçkisinə qatılan 25 partiyanın hər biri dövlətdən maliyyə yardımı alacaq.
İlkin nəticələrə görə, Yeni Azərbaycan Partiyası 125 yerlik Milli Məclisə 68, Vətəndaş Həmrəyliyi Partiyası 3, Ədalət, Hüquq, Demokratiya Partiyası 2, Ana Vətən Partiyası, Azərbaycan Demokratik Maarifçilik Partiyası, Azərbaycan Milli İstiqlal Partiyası, Böyük Azərbaycan Partiyası, Böyük Quruluş Partiyası, Demokratik İslahatlar Partiyası, Milli Cəbhə Partiyası, Respublikaçı Alternativ Partiyası 1 mandat qazanır.
Seçkidə bu partiyalar da iştirak edib: Ağ Partiya, Azad Vətən Partiyası, Azərbaycan Demokrat Partiyası, Azərbaycan Xalq Partiyası, Azərbaycan Ümid Partiyası, Ədalət Partiyası, Gələcək Azərbaycan Partiyası, Haqq-Ədalət Partiyası, Klassik Xalq Cəbhəsi Partiyası, Milli Dirçəliş Hərəkatı Partiyası, Müasir Müsavat Partiyası, Müsavat Partiyası, Vəhdət Partiyası, Yeni Zaman Partiyası.
“Siyasi partiyalar haqqında qanun”a görə, dövlət büdcəsindən partiyalara ayrılan vəsaitin 40 faizi Milli Məclisdə təmsil olunan siyasi partiyalar arasında bərabər bölünür, 50 faizi parlament partiyaları deputatlarının sayı əsasında paylanır.
Vəsaitin 5 faizi Milli Məclisə təkrar və əlavə seçkilər nəticəsində, həmçinin fəaliyyətdə olan deputatların partiya mənsubiyyətinin yaranması (dəyişməsi) ilə əlaqədar Milli Məclisdə təmsil olunan yeni siyasi partiyalara düşür, 2,5 faizi namizədləri Milli Məclisə seçkidə etibarlı səslər qazanmış, lakin parlamentdə təmsil olunmayan siyasi partiyalar arasında bərabər, 2,5 faizi qazanılmış səslərin sayına uyğun bölünür.
